ZANZIBAR: WATU 9 WAKAMATWA KWA KULA MCHANA WAKATI WA RAMADHANI


WATU tisa wamekamatwa kisiwani Zanzibar pamoja na Bar tatu kufungwa kwa makosa mawili tofauti tangu kuanza mfungo wa mwezi wa Ramadhani. 

Katika kosa la kwanza, watu tisa wamekamatwa kwa kula chakula mchana katika kipindi hiki cha mwezi wa Ramadhani.
 

Aidha, katika kosa lingine Bar tatu zimefungwa kutokana na kuuza chakula mchana katika mkoa wa mjini Magharib Unguja hadi kumalizika kwa mwezi wa Ramadhani.
 

Mkuu wa mkoa huo, Ayoub Mohammed Mahmoud aliziagiza manispaa zote kusitisha leseni ya biashara za vileo katika kipindi chote cha mwenzi mtukufu wa Ramadhani.
 

Alisema hatua hiyo itaimarisha imani za watu na kuzitaka manispaa hizo kusimamia agizo hilo na kufuata kanuni za wizara ya afya ili kuepusha mripuko wa maradhi.
 

“Ili waumini waweze kuukabili mwenzi huu lazima kwa wananchi kutumia fursa za Ramadhani kwa kufanya mambo mema ili Allah azikubalie swaumu zetu”alisema Ayoub..
 

Aidha, aliwataka watembeza watalii kutoa mwongozo kwa wageni kwa kufuata utaratibu ulio sahihi kwa kuvaa mavazi ya heshima na yanayo kubalika kutokana na mila,silka na utamaduni.
 

Hata hivyo, aliwataka wafanyabiashara wa bidhaa za chakula na nafaka kupunguza bei za bidhaa ili Wananchi wanyonge waweze kumudu na kununua bidhaa hizo kwa ajili ya futari.
 

Alisema kuwa serikali ya Zanzibar imetoa punguzo la kodi kwa baadhi ya bidhaa za nafaka na chakula zinazotoka nje ya Zanzibar.
Alisema bidhaa zilizopewa punguzo la kodi ni sukari, mchele, tende na unga wa ngano ambazo zote huagizwa kutoka nje ya nchi.

SAMBAZA HABARI HII
Habari Iliyopita
Habari Inayofuata