WANAFUNZI WALIOSOMA SHULE YA MSINGI ISAGEHE WAJIUNGA NA KUPELEKA VIFAA VYA UJENZI WA CHOO KATIKA SHULE HIYO.



Jumla ya wavulana 339 wanaosoma katika Shule ya Msingi Isagehe Halmashauri ya Mji wa Kahama wanakabiriwa na ukosefu wa matundu ya choo hali ambayo imesababisha watumie matundu yaliyokuwa yakitumiwa na wanafunzi wasichana wa shule hiyo.

Hayo yamebainishwa jana na Mwalimu mkuu wa shule hiyo, NAMSEMBA MRISHA wakati akipokea msaada wa vifaa vya ujenzi kutoka kwa baadhi ya wanafunzi waliowahi kusoma katika shule hiyo.

Akizungumza wakati wa kukabidhi msaada huo, Mwenyekiti wa wanafunzi waliosoma katika shule hiyo, ZABRON FEGA amesema wametoa mifuko ya saruji 30, Nondo 50 na malori 10 ya mawe vyote vikiwa na thamani  ya zaidi ya shilingi  Milioni 2.

Mwenyekiti wa Kijiji cha Isagehe, ALEXANDER JOHN na mwenyekiti wa kamati ya shule hiyo, MABALA NKANDI wamesema wameahidi kikamilifu matumizi ya vifaa hivyo ili vitumike kwa malengo yaliyokusudiwa.

Nao baadhi ya wananchi wa Kijiji cha Isagehe wamepongeza jitihada zilizofanywa na wanafunzi hao wa zamani wa shule ya Msingi Isagehe na kwamba msaada wao umeleta mwamko kwa wazazi katika kuchangia  sekta mbalimbali    za maendeleo.

Kwa upande wake, Afisa elimu shule za msingi Halmashauri ya Mji wa Kahama,  ALUKO LUKOLELA  amesema Halmashauri yake itaendelea kushirikiana na wadau wa sekta ya elimu na kwamba   wananchi wanapaswa kutambua kuwa  serikali inaruhusu michango ya hiari.

Shule ya Msingi Isagehe ilianzishwa mwaka 1939  ambapo kwa sasa inawanafunzi  774 huku ukosefu wa matundu ya choo kwa  wavulana ukidumu tangu mwaka 2015.

SAMBAZA HABARI HII
Habari Iliyopita
Habari Inayofuata